Të mërkurën, më 16 korrik, pritet të merret një nga vendimet më të rëndësishme në procesin gjyqësor ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi.
Gjykata ka caktuar këtë datë për të shpallur vendimin mbi mocionin e paraqitur nga ekipet mbrojtëse, të cilat kërkojnë rrëzimin e disa pikave të aktakuzës për krime lufte dhe krime kundër njerëzimit.
Seanca nis në orën 09:00 dhe pritet të vazhdojë gjatë ditës me dëgjimin e dëshmitarëve ekspertë të Zyrës së Mbrojtësit të Viktimave.
Gjykata ka urdhëruar që dëshmitarët të jenë të pranishëm pavarësisht rezultatit të mocionit, pasi ky është cilësuar si një vendim me ndikim të kufizuar në rrjedhën e seancave.
Sipas avokatit Taulant Hodaj, kjo fazë përbën një moment vendimtar për përcaktimin e forcës së aktakuzës: “Nëse provat e paraqitura nga prokuroria nuk janë të mjaftueshme, gjykata mund të rrëzojë disa pika. Në të kundërt, procesi vijon me të gjitha pikat aktuale të aktakuzës.”
Vendimi i së mërkurës pritet të ndikojë drejtpërdrejt në drejtimin që do të marrë vendimi përfundimtar, i cili mund të jepet në fund të këtij viti ose në fillim të 2026-ës.
Paralelisht, Gjykata Speciale ka lënë në fuqi dënimin me 15 vjet burg për Salih Mustafën, ndërsa për Pjetër Shalën është vendosur ulja e dënimit nga 18 në 13 vjet. Në rastin e këtij të fundit, palët kanë mundësi të paraqesin ankesa në Gjykatën Supreme.
Sipas përfaqësueses së Institutit të Kosovës për Drejtësi, Blendina Veliqi, në këtë fazë nuk shqyrtohen provat në themel, por trajtohen pretendimet për shkelje të ligjit, të cilat nëse pranohen, mund të çojnë në ndryshime ose rishqyrtim të vendimeve.
