Në prangat e policisë së Matit ka rënë një 40-vjeçar, pasi ka terrorizuar banorët duke qëlluar me armë zjarri në ajër.
Bujar Kupneshi ka shkaktuar panik tek banorët e zonës, duke qëlluar pa pushim me armë në oborrin e shtëpisë së tij. Kanë qenë banorët ata të cilët kanë njoftuar policinë, duke i kërkuar ndihmë. Uniformat blu janë nisur menjëherë drejt vendngjarjes, dhe e kanë arrestuar duke shmangur kështu ndonjë tragjedi të mundshme. Policia ka sekuestruar në cilësinë e provës materiale armën e zjarrit pushkë, një sasi municionesh luftarake dhe katër pako me lëndë plasëse.
“Shërbimet e Komisariatit të Policisë Mat, pas një telefonate në numrin 112, nga banorët e zonës që kërkonin ndihmë, pasi në fshatin Prell, një banor i zonës po qëllonte me armë zjarri duke rrezikuar jetën e banorëve dhe kalimtarëve të rastit, kanë shkuar menjëherë në vendngjarje dhe në mënyrë profesionale kanë ndërhyrë duke neutralizuar dhe vënë në pranga shtetasin Bujar Kupneshi., 40 vjeç, banues në fshatin Prell, Mat.
Ky shtetas po qëllonte në ajër me armë zjarri pushkë në oborrin e banesës së tij.
Policia ka sekuestruar në cilësinë e provës materiale armën e zjarrit pushkë, një sasi municioni luftarak dhe katër pako me lëndë plasëse.”, njofton policia.
Materialet procedurale i kaluan Prokurorisë pranë Gjykatës së Shkallës së Parë Mat, për veprime të mëtejshme.
