Ndërsa trafiku nga mëngjesi në darkë është një ndër streset më të mëdha të drejtuesve të mjeteve në kryeqytet, dikush më në fund i dëgjoi lutjet tona.
Së shpejti nuk do të shikoni më postblloqe policore në akset e vendit, si dhe vendosje të policëve si semaforë në kryqëzime.
Të paktën kjo është kërkesa e ministrit të Brendshëm, Sandër Lleshaj, për drejtorin e Përgjithshëm të Policisë së Shtetit.
Ministri thekson se prania e policisë në numër të tepruar dhe statike, nuk sjell ndonjë vlerë të shtuar në rritjen e parametrave të sigurisë rrugore.
“Prania e postblloqeve policore u jep rrugëve një pamje jo normale, të ndryshme nga ato të vendeve europiane dhe krijon përshtypjen e gabuar të një policie shumë të madhe, teksa raportet e numrit të policëve për frymë në vendin tonë janë më të ulëtat në rajon. Me qëllim që të përmirësohet më tej niveli i sigurisë në qarkullimin rrugor, kërkoj që të merren masa të shpejta dhe të plota për të zbatuar gjithnjë e më shumë patrullimin në vend të postblloqeve në akset rrugore të vendit”, nënvizon ministri Lleshaj.
Masa e dytë është shmangia në maksimum e punonjësve të Policisë Rrugore, që dublojnë semaforët. Kjo praktikë ndikon në edukim të gabuar të përdoruesve të rrugës, në raport me rregullat e qarkullimit rrugor.
Ndër masat e tjera që do të nisin zbatimin shpejt, është projekti për dërgimin e gjobave nëpërmjet Postës, në adresë të shoferëve shkelës.
