Gjykata Speciale të detyrohet nga Kuvendi i Kosovës të mbajë shenjat e Republikës, ose t’i ndërpritet funksionimi. Reagimi vjen nga ish-Presidenti i Shqipërisë, Rexhep Meidani. Ai propozon që Kuvendi të Kosovës t’i ndërpresë Gjykatës Speciale mandatin e funksionimit deri sa të vendosë shenjat zyrtare. Ai shton se edhe mënyra si ish-Presidenti Thaçi u çua në sallën e Gjykatës, me pranga ishte një turp.
Statusi i plotë
“Më bëri përshtypje një pasazh. Avokati mbrojtës i presidentit H. Thaci, David Hooper, thekson ndër të tjera: “Ku janë pretendimet për trafikimin e organeve, sepse këto ishin shumë të rëndësishme për lindjen e kësaj gjykate”.
Ndërkohë që Thaçi është përgjigjur shkurt vetëm për pyetjet e domosdoshme duke thënë se avokati i parashtroi më së miri pretendimet e tij, vete avokati pohoi me bindje se informacioni për mbajtjen në arrest të ish presidentit ishte i paplotë, se sjellja e tij në sallë me pranga ishte një turp dhe se salla gjykatës nuk kishte asnjë shenjë që të tregonte se ai qe një institucion kosovar, i miratuar nga parlamenti i këtij vendi.
Nëse me të vërtetë, në sallën e kësaj gjykate nuk ka asnjë shenjë të një institucioni kosovar, atëherë, me urgjencë, Kuvendi i Kosovës duhet të ndërmarrë iniciativën e domosdoshme për amendamente ligjore rregulluese e imponuese, pse jo dhe për vendosjen e një afati kohëshkurtër të ndërprerjes së funksionimit të kësaj sajese politike, të miratuar në një parlament vendor dhe të “pompuar” si gjoja një gjykatë ndërkombëtare!…”
/GazetaReforma.com/
