Një megaoperacion ka vënë në pranga 26 persona, pjesë të një grupi të strukturuar kriminal mbrëmjen e sotme.
Operacioni i shërbimit diplomatik të Sigurisë në Ambasadën Amerikane në Tirana, në bashkëpunim me një njësi speciale nga Policia e Shtetit ka kryer operacionin “Crystal Eagle”, duke vënë në pranga 26 persona, mes tyre dy agjentë krimesh me inicialet B.I dhe B.M., dhe punonjës të aeroportit të Rinasit “Nënë Tereza”.
Sipas Dosja.al, personat e vënë në pranga janë pjesë e një grupi të strukturual kriminal që dërgonin klandestinë nga Shqipëria drejt Anglisë, SHBA-së dhe Kanadasë, duke u siguruar viza false në këmbim të parave.
Ata përdornin tre mënyra për të kaluar klandestinët drejt SHBA-ve.
- E para, klandestinët kalonin nga Shqipëria drejt Gjermanisë e më pas kalonin në Republikën Doemnikane. Pas saj, shqiptarët vendoseshin në Meksikë e më pas futeshin në SHBA.
- E dyta, Shqipëri-Bullgari-Francë-Republika Domenikane dhe më pas për në Amerikë.
- Ndërsa mënyra e tretë është kalimi përmes Francës dhe Londrës, konkretisht itinerari dhe Shqipëri-Francë-Londër-R.Domenikane dhe më pas në SHBA.
Deri më tani është mësuar se 16 prej tyre janë arrestuar me kërkesë të Prokurorisë së Posaçme (SPAK), 8 janë në detyrim paraqitje dhe 2 të tjerë po hetohen në gjendje të lirë.
Në lidhje me këtë megaoperacion të shtrirë pritet që nesër të ketë nëj konferencë të përbashkët nga SPAK dhe Policia e Shtetit, për të zbardhur më tepër detaje.
