Media kroate Dnevik.hr ka rindërtuar në versionin 3D aksidentin e autobusit nga Kosova i cili u rrokullis në Slavonski Brod të Kroacisë. Ilustrimi 3D i videos është bërë me ndihmën e informacioneve pas një hetimi policor.
Bazuar në ilustrimin që ka bërë media kroate, autobusi i pasagjerëve kosovarë pasi kishte kaluar në zonën e gjelbëruar ishte rrokullisur.
Sipas informacioneve të vërtetuara, shoferi i autobusit po lëvizte në korsinë jugore në drejtim të Lipovacit, në kilometrin e 211-të, kur humbi drejtimin dhe doli nga rruga.
Sjellim në vëmendje se nga ky aksident tragjik, 10 persona kanë humbur jetën dhe mbi 40 të tjerë kanë pësuar lëndime pas përplasjes së autobusit në Kroaci.
Shoferi i autobusit është arrestuar dhe sipas dëshmisë së tij dhënë policisë kroate, atë në momentin tragjik e kishte zënë gjumi. Autobusi po vinte nga Frankfurti i Gjermanisë për në Kosovë. Në autobus ishin 69 pasagjerë.
Këtu mund të shihni videon e projeksionit 3D
Po ashtu Presidentja e Republikës së Kosovës, Vjosa Osmani në mbështetje të Kushtetutës së Kosovës, ka marrë vendimin që dita e hënë, 26 korrik 2021, të shpallet ditë zie, shtetërore në nderim të qytetarëve të Republikës së Kosovës, të cilët kanë humbur jetën tragjikisht në aksident rrugor në Republikën e Kroacisë. Gjithashtu si pasojë e ngjarjes tragjike, Presidentja Vjosa Osmani, ka anuluar vizitën e saj në Japoni dhe ditën e nesërme do të niset drejt Kosovës.
