Kryeministri Edi Rama, pak ditë më parë zhvilloi një takim në qytetin e Gjirokastrës, në kuadër të fushatës elektorale, por u ndal edhe te një nga shtëpitë tradicionale të këtij qyteti të restauruar së fundmi nga TIKA. Mediat greke i kanë kushtuar një artikull të gjatë vizitës së kryeministrit Rama në Gjirokastër dhe veçanërisht takimit me Ministrin e Kulturës së Turqisë, Mehmet Nuri Ersoy. mediat greke janë ndalur pikërisht tek restaurimi i shtëpisë tradicionale nga TIKA dhe e kanë vlerësuar atë si një rivendosje të trashëgimisë osmane në qytetin jugor. Madje ato shkojnë edhe më tej duke e cilësuar Ramën si një pro-turk dhe që nuk i fsheh ndjenjat e tij për Turqinë dhe marrëdhëniet e veçanta me Erdogan.
Gjirokastra sipas mediave greke është qendër e pakicës së tyre, ndërkohë që qeveria shqiptare deri më sot nuk ka tentuar të nxjerrë në pah trashëgiminë kulturore të Gjirokastrës të lidhur me fenë ortodokse në rajon. Kujtojmë se edhe më herët mediat greke kanë hedhur dyshimin se Turqia po përdor Shqipërinë si mjetin kërcënues për shtetin helen. Ajo e vë theksin në një dekret të fundit të firmosur, ku Turqia mund të transportojë municione dhe armë luftarake në një shtet aleat, ku veçojnë Shqipërinë dhe Maqedoninë e Veriut.
