Ditën e sotme, siç pritej, është rënduar bilanci i të prekurve nga Coronavirusi në Shqipëri, teksa mëngjesin e sotëm u shënua viktima e pestë, ndërsa vetëm gjatë 24 orëve të fundit janë konfirmuar edhe 19 raste të reja, duke e çuar numrin total të të prekurve në 123 persona.
Qarqet më të prekura janë Tirana me numrin më të madh, si edhe Fieri e Durrësi, teksa harta e të prekurve nga COVID-19 është shtrirë tashmë edhe në Lezhë, Has, Berat e Shkodër.
Kjo është java e tretë që prej ditës kur u regjistrua rasti i parë me COVID-19 dhe eksperienca e vendeve të tjera konfirmon se kjo javë dhe tjetra janë periudha kur numri i të prekurve kap kulmin.
Së fundmi, tre ambulanca kanë mbërritur në ambientet e Spitalit Infektiv brenda pak minutash dhe sipas “BalkanWeb” mes personave të dyshuar ishte edhe një grua.
Nuk dihet me saktësi nëse janë të dyshuar apo të diagnostifikuar me COVID-19, pasi gjithçka analizohet brenda në katin e parë të Urgjencës, teksa ka shkuar në 5 numri i personave që kanë mbërritur sot në Infektiv.
Autoritetet kanë bërë me dije se në spital janë 57 persona të shtruar, por nëse këta 5 persona konfirmohen, atëherë numri shkon në 62.
Ditën e sotme u konfirmua se edhe kreu i Urgjencës Kombëtare, Skënder Brataj, ka rezultuar i prekur nga COVID-19, por nuk ka shumë detaje për gjendjen e Brataj, ndërkohë që vihet në dyshim dhe infektimi i Task-Forcës, ku merrte pjesë ai.
