Reperi i njohur shqiptar, Noizy, është arrestuar në Zvicër menjëherë pas mbërritjes në aeroportin e Cyrihut, ku kishte planifikuar të performonte në një klub nate si pjesë e turit të promovimit të albumit të tij më të fundit.
Burime për “Prive By LS” raportojnë se ndalimi u krye nga autoritetet zvicerane me urdhër të Zyrës së Prokurorit Publik për Krime të Rënda dhe të Dhunshme. Deri më tani nuk ka një sqarim zyrtar për arsyet e ndalimit, por dyshohet se mund të lidhet me çështje të mëparshme ligjore apo probleme me dokumentacionin për performancën në territorin zviceran.
Ndërkohë, klubi ku ishte planifikuar koncerti ka fshirë të gjitha njoftimet dhe posterët nga rrjetet sociale, ndërsa Noizy vetë nuk ka reaguar ende publikisht për situatën.
Ky nuk është rasti i parë që reperi përballet me probleme me ligjin. Në gusht të vitit të kaluar, ai u arrestua në Shqipëri në lidhje me një incident të dhunshëm në një diskotekë. U lirua me kusht disa ditë më pas, ndërsa në nëntor u dënua me një gjobë prej 15 mijë eurosh për këtë ngjarje.
