Shqipëria po vijon luftën me koronavirusin, ku deri më tani janë shënuar 33 të infektuar dhe një viktimë, ndërsa Infektivi është kthyer në karantinë.
“Balkanweb” shkruan, se disa persona, kërkojnë shtrimin urgjent të familjarit të tyre pasi ka simptoma të COVID-19, ndërsa kanë debatuar me personelin.
E sëmura është një 51 vjeçare, i cili sapo është kthyer nga Italia.
Mësohet se ajo po mbahet në një automjet të parkuar pranë Infektivit prej 30 minutash.
Gjithashtu më herët është paraqitur edhe një rast tjetër i dyshuar me koronavirus.
Qeveria ka marrë disa masa shtrënguese për parandalimin e koronavirusit, duke nisur nga mbyllja e shkollave, lokaleve, call centerave dhe fasonerive.
Prej dy ditësh ushtria dhe policia kanë ngritur pika kontrolli në të gjithë vendin për të mbikëqyrur personat që nuk respektojnë rregullat e karantinimit.
Deri më tani policia bën me dije se janë ndëshkuar mbi 500 shoferë, që nuk kanë zbatuar urdhërin e qeverisë, për ndalimin e qarkullimit të makinave private.
