Pas më shumë se një muaj luftë, një lajm I mirë vjen nga zëvendësministria e Mbrojtjes në Ukrainë, Hanna Malyar e cila u shpreh se forcat e vendit kanë rimarrë të gjithë rajonin e Kievit.
“I gjithë rajoni i Kievit është çliruar nga pushtuesi”, tha Hanna Malyar.
Kjo deklaratë vjen pasi zyrtarët ukrainas thanë se kishin rimarrë qytetin e Brovary, i cili është 12 milje në lindje të kryeqytetit Kiev.
Ndërkohë që kryetari i bashkisë së Brovary tha në një fjalim televiziv se “pushtuesit rusë tani janë larguar pothuajse nga të gjithë rrethin e Brovary”.
“Ushtria ruse po i përqendron sulmet e saj në rajonet lindore të Ukrainës”, tha Olexiy Arestovych, këshilltar i presidentit ukrainas, Volodymyr Zelensky, duke theksuar se ka pasur sulme ajrore në qytetet Mariupol, Harkiv dhe Çernihiv.
“Armiku po përpiqet ta kthejë Çernihivin në një Mariupol të dytë“, shtoi Arestovych.
Gjithashtu presidenti ukrainas, Volodymyr Zelenskyy akuzoi këtë të shtunë ushtarët rusë se po lënë mina gjatë tërheqjes në zonat në veri të Ukrainës.
Ukraina thotë se trupat e saj kanë rimarrë kontrollin e më shumë se 30 qyteteve dhe fshatrave në rajonin e Kievit që kur Rusia njoftoi këtë javë se do të pakësojë operacionet e saj rreth kryeqytetit për t’u fokusuar në lindje.
Kujtojmë që media ukrainase Interfax, ka raportuar se Turqia me shumë gjasë do të jetë vendi ku do të takohen presidentët Vladimir Putin dhe Volodymyr Zelensky, për të diskutuar në lidhje me marrëveshjen e paqes.
Sipas mediave, Presidenti i Turqisë Recep Tayyip Erdogan ka telefonuar Putinin dhe Zelenskyn të premten. Për këtë gjë ka folur edhe negociatori ukrainas, David Arakhamia.
