Një ngjarje tragjike tronditi Shkodrën pasditen e së hënës, kur një 15-vjeçar humbi jetën pas një konflikti me thikë me një bashkëmoshatar. Ngjarja ndodhi rreth orës 19:30 në zonën e Fermentimit, në lagjen “Skënderbeg”.
Viktima, e identifikuar si Emiljano Gjoni, u plagos me thikë gjatë konfliktit dhe ndërroi jetë në Spitalin Rajonal Shkodër si pasojë e plagëve të marra. Policia identifikoi dhe shoqëroi në komisariat një 15-vjeçar tjetër, Klodian Kolbuçaj, i dyshuar si autor i krimit.
“Qëlluam të dy në lagje dhe Emiljano kishte një thikë në dorë. Ai më qëlloi në sup dhe gjatë përplasjes tonë fizike thika i ra në tokë. Unë e mora nga toka thikën që kishte Emiljano më parë dhe për t’u vetëmbrojtur e qëllova me idenë për ta plagosur dhe më pas u largova nga vendngjarja” Klodian Kolbuçaj.
Mësohet se 15-vjeçari është qëlluar vetëm një herë me thikë në zemër ndërsa ka pësuar hemorragji duke e bërë të pamundur shpëtimin e tij në Spitalin Rajonal të Shkodrës pasi u dërgua nga një qytetar i rastësishëm
Viktima dhe autori frekuentonin të njëjtën shkollë, teksa ishin në vitin e parë në shkollën e mesme profesionale “Hamdi Bushati” në Shkodër.
Ajo që dyshon policia është se dy të miturit mund të kenë pasur konflikt të mëparshëm duke qenë se ishin në të njëjtën shkollë, konflikt i cili përfundoi më pas me ngjarjen fatale.
Policia konfirmoi se edhe i dyshuari kishte pësuar dëmtime të lehta në sup, por pa rrezik për jetën. Grupi hetimor, nën drejtimin e Prokurorisë, po vijon hetimet intensive për të zbardhur plotësisht dinamikën e ngjarjes.
Procedurat po kryhen në prani të psikologut dhe familjarëve, duke marrë parasysh moshën e mitur të të dyshuarit.
Autoritetet kanë sekuestruar thikën e përdorur në krim si provë materiale. Hetimet pritet të sqarojnë më tej rrethanat e plota të kësaj ngjarjeje tragjike që ka tronditur komunitetin lokal.
