Gjykata greke vendosi sot që Kastriot Cenko, i akuzuar për vrasjen e bashkëshortes së tij Alba Cenko, të qëndrojë në paraburgim.
39-vjeçari u shfaq i penduar dhe me lot në sy gjatë seancës gjyqësore, ku pranoi krimin duke shprehur dëshirën që të mund të kthente kohën pas.
Sipas vendimit të gjykatës, arrestimi i tij për vrasjen e 32-vjeçares në Ampelokipi të Greqisë u konsiderua i ligjshëm.
“Gjatë kërkimit të faljes për krimin në familje që bëri në mënyrë brutale në Ampelokipi ditë më parë, i akuzuari u shfaq i shkatërruar dhe qante vazhdimisht”, shkruhet në njoftim.
Cenko, i cili u dorëzua në polici shtatë ditë pas ngjarjes, kishte fshehur trupin e viktimës në papafingo dhe pretendoi se nuk e kishte planifikuar aktin. Ai deklaroi se ishte në një gjendje të rënduar psikologjike dhe se pas krimit u kap nga paniku.
Në dëshminë e tij, i akuzuari pohoi se kishte tentuar ta ringjallte bashkëshorten pas goditjeve fatale.
Kur kuptoi se ajo kishte ndërruar jetë, ai vendosi të fshehë trupin dhe të përdorë mesazhet për të krijuar përshtypjen se viktima ishte ende gjallë.
“Më pushtoi paniku kur kuptova që ajo kishte vdekur”, tha Cenko.
Rasti ka tronditur opinionin publik dhe procesi hetimor po vijon për të zbardhur plotësisht ngjarjen.
