Ditën e sotme është ndarë nga jeta në Tiranë, në moshën 97-vjeçare, Vito Kapo, e veja e Hysni Kapos.
Ndarja e saj nga jeta vjen tre ditë pas vdekjes së Nexhmije Hoxhës.
Vito Kapo ka qenë një nga figurat më të rëndësishme të PPSH-së dhe ka mbajtur poste të rëndësishme gjatë regjimit komunist.
Ajo ka qenë ish-ministre e Industrisë së lehtë në vitet 1987-1990, si dhe ish-kryetare e Bashkimit të Grave para viteve ‘90
Kapo është angazhuar edhe në formacionet partizane si sekretare e Enver Hoxhës pranë shtabit të përgjithshëm në Helmës dhe Odriçan, ndërsa nga nëntori 1944 deri në maj 1945, në Komitetin Qëndror të Partisë Komuniste.
Vito Kapo lindi më 9 nëntor 1922 në Nivan të Zagorisë. Në vitin 1941 ajo mbaroi Institutin Femëror “Nana Mbretneshë” në Tiranë.
Në vitet 1942-1943 u bë pjesë e grupit komunist të Shkodrës.
Në shkurt maj 1942 ajo shërbeu si mësuese në fshatin e lindjes.
Nga 1943-1944, ishte anëtare e sekretare organizative e Komitetit Rajonal të Partisë Komuniste për Gjirokastrën.
Pas ardhjes në pushtet të Partisë Komuniste, në korrik 1945 deri në maj 1946, punoi atashe shtypi në legatën shqiptare në Beograd, ku Hysni Kapo shërbeu si amabasador.
Më vonë ajo u emërua drejtoreshë e Arsimit të Lartë dhe për një kohë të gjatë drejtoi Bashkimin e Grave të Shqipërisë.
Nga 1960-1965 Vito Kapo ndoqi studimet në Fakultetin e Historisë dhe Filologjisë.
