Pas lajmit se një dozë e re vaksinash priten të mbërrijnë në Shqipëri, kryeministri Edi Rama ka njoftuar “planin” e shumëpritur të vaksinimit.
Ai tha se gjatë kësaj jave vaksinimi anti-Covid do të shtrihet edhe në dy qytete të tjera, përkatësisht në Vlorë dhe Shkodër.
Kreu i qeverisë deklaroi se po këtë javë përveç bluzave të bardha, do të nisë vaksinimi edhe te më të moshuarit. Në këtë fazë të parë do të jenë në total 1100 vaksina nga 7020 që kanë mbërritur në Shqipëri.
Nga spitali rajonal i Shkodrës do ta bëjnë të gjithë ata që punojnë në repartet e infektivit, pneumologjisë, infektivit dhe urgjencës si të gjithë nga repartet e tjera që janë mbi moshën 55 vjeç.
Po ashtu edhe të gjithë punonjësit e tjerë të shëndetësisë që janë mbi 55 vjeç në Shkodër do të vaksinohen duke qenë se janë me risk më të lartë infektimi.
Ndërkohë bëhet me dije se edhe stafi dhe personat rezident në shtëpinë e të moshuarve do të vaksinohen gjatë ditës së nesërme në Shkodër.
Pallati i sportit “Qazim Dervishi” të paktën për 10 ditë do të shërbejë për kryerjen e vaksinimit në fushatën “Shqipëria Buzëqesh”.
Ndërkohë faza e dytë e vaksinimit në Shkodër pritet që të bëhet pas një jave dhe pritet që të mbërrijnë afro 1 mijë doza të tjera
I ndodhur në aeroportin “Nënë Tereza” për të pritur 7020 doza të tjera vaksinash antiCovid nga Pfizer, kryeminsitri Edi Rama tha se ka marrë premtim me shkrim edhe nga një tjetër shtet për të sjellë në Shqipëri në muajin prill 360 mijë doza të vaksinës AstraZeneca.
Rama tha se marrëveshja nuk është firmosur, por pritet që së shpejti me këtë shtet të kemi një takim në nivel zyrtarësh të lartë.
Kujtojmë se ky është “plani” i parë i qeverisë mbi vaksinimin, pasi pas qindra dozash të siguruara të vaksinave, vetëm një pjesë e vogël e mjekëve janë vaksinuar në Tiranë.
