Që përdorimi dhe shpërndarja e drogës është një fenomen, kjo gjë tashmë dihet. Por ka raste aq flagrante, saqë të bëjnë të mendohesh. Një grua ka telefonuar policinë duke i kërkuar ndihmë. Ajo dha adresën dhe iu përgjërua sallës operative “ju lutem më ndihmoni”. Por kur forcat e rendit mbërritën në adresën e saj, ajo duke kërkuar ndihmë tha “kam pirë drogë”. Ajo çfarë u konstatua më pas në hotel ishte befasuese për forcat e rendit që gjetën pjeta me mbetje kokaine dhe qese me hashash. Në raport shërbimi që gazeta Si e disponon agjentët shkruajnë:
“Morëm njoftim se një qytetare kërkonte ndihmë. Ajo ndodhej në hotelin në rrugën Artan Lenja. Kur shkuam në dhomën numër 203 ku dhe gjendej telefonuesja, konstatuam shtetaset A. T dhe A. Q, të cilat menjëherë deklaruan që kishin me vete hashash”.
Sipas përshkrimit të oficerit të policisë burimet shtojnë se e reja me inicialet A. Q. nxori nga xhepi i xhupit gjashtë qese me lëndë narkotike të dyshuar canabiss sativa. Për këtë arsye ajo u shoqërua në polici. Por nga kontrolli i dhomës së hotelit në fjalë, policia u zhvendos edhe në dhoma të tjera sikurse dhoma me numër 301, ku sërish shtetasit S. Sh ju gjet me vete kokainë në qese të mbyllura në formë pike dhe në një pjatë kishte gjithashtu mbetje kokaine, një kartë identifikuese dogane me inicialet N.P, një kartë me mbishkrimin Flex. Pasi u bë peshimi i lëndës rezultoi se pesha e përgjithshme e kokainës ishte 0.4 gramë.
Policia ka kryer veprime të mëtejshme duke këqyrur telefonin e klientit të tretë, ku dhe rezultoi se ai kishte biseda me një punonjës hoteli me inicialet I. Gj, duke shtuar dyshimet se ai shpërndante drogë tek klientët.
Vajza me inicialet A. Q që më pas u arrestua dëshmon se përse e telefonoi policinë “e telefonova policinë për ndihmë, pasi u konfliktova me shoqen time A. T, e cila erdhi në dhomën ku unë qëndroja. Pasi erdhi policia unë ju thashë vetë kemi edhe drogë dhe nxora nga xhepat katër qese hashash dhe ia dorëzova policit. Shoqja ime nuk e pranoi që kishte drogë me vete”. Burimet e policisë tregojnë për gazetën Si se u pyet edhe A.T që pretendon se e kishte telefonuar shoqen për t’i paguar hotelin. “Shkova në gjashtë të mëngjesit, fillimisht u shtriva në krevat pasi natën kisha punuar dhe i thashë edhe A.Q që të shtrihet. Por ajo telefonoi policinë dhe kërkoi ndihmë pasi nuk donte të shtrihej”.
Policia ka gjetur kontradikta në dëshminë e të tyre ndaj janë arrestuar të dyja. A. Q këmbëngul që hashashin ia solli shoqes së saj një person nga Laçi, kurse e dyta thekson se hashashi nuk ishte aspak i saj dhe se ajo nuk e gjet fare drogën.
Klienti i tretë që ju gjet kokainë dhe që edhe ai përfundoi i arrestuar së bashku me punonjësin e hotelit pranoi që kishte konsumuar drogë vetëm. Por ai mohon që drogën ta ketë blerë tek hotelieri. “Kokainën e bleva tek një i panjohur, e kisha për përdorim vetjak, pasi jam përdorues prej vitesh. Pjatën ia kërkova recepsionistit ose ma solli ai nuk e mbaj mend dhe nuk më kujtohet”, shton më tej klienti që u prangos së bashku me recepsionistin, i cili gjithashtu mohon përfshirjen.
