Presidenti i PL-së, Ilir Meta duket se ka ecur me parimin “më mirë vonë sesa kurrë”, në një moment kritik e padrejtësie që po u bëhet banorëve që preken nga projekti i autostradës Thumanë-Kashar.
Nga selia e tij, përmes një deklaratë për shtyp ai i konsideroi të drejta kërkesat e banorëve, ndërsa u shpreh se kjo rrugë e florinjtë nga një mundësi zhvillimi po shndërrohet në një instrument zhvatjeje dhe falimentimi për bizneset e ndershme në zonë.
Megjithatë, heshtja e opozitës në tërësi si dhe e kryetarit, Sali Berisha flet vetë. Duket se interesi për t’u ngritur dhe për t’u bërë palë me problemin e qytetarëve ka rënë. Heshtja e tyre pohon se dalëngadalë po qëndrojnë në anën e oligarkëve e qeveritarëve në këtë skandal të madh që po luhet me taksat e qytetarëve. Ku u fsheh opozita në protestën e banorëve që po zhvaten çdo ditë?
Deklarata e Metës:
Dhuna shproporcionale e banditëve të Policisë së Shtetit dhe më rëndë akoma përdorimi i lëndëve kimike janë dëshmi së e vetmja rrugë që po ndjek Narkoqeveria nuk është dëgjimi i halleve të qytetarëve dhe as zgjidhja e problemeve të tyre por shurdhëria dhe imponimi me dhunë i vendimeve arbitrare në kurriz të tyre.
Dënoj me forcë keqpërdorimin kriminal të strukturave të Policisë së Shtetit, si një mjet represioni ndaj qytetarëve, që për fat të keq po kthehet në normë në regjimin autoritar të Edi Ramës, pasi të njëjtat pamje dhune ne i shohim tani në mbarë vendin, kudo ku qytetarët ngrihen në protesta demokratike për të drejtat e tyre, siç e pamë në rastin e protestës së fermerëve duarartë të Maliqit e Korçës.
