Pak ditë më parë, më 25 nëntor në qendër të Tiranës u sulmua një 19-vjeçare nga një person, i cili ka tentuar ta përdhunojë.
Autori është identifikuar si Marash Gjoklaj, i cili tentoi që ta fuste vajzën në një magazinë pranë biznesit ku punonte për të kryer marrëdhënie seksuale me të.
Ngjarjen me detaje e ka shpjeguar e reja,e cila tregon se është studente dhe se punon për të hequr shpenzimet mujore në Tiranë.
“Jam studente dhe pasditeve punoj për të siguruar të ardhurat e mia. Punoj pranë një biznesi në qendër të Tiranës, për të hequr shpenzimet e mia studentore. Familja ime është larg dhe unë jetoj me motrën time. Ditën e shtunë me datë 25 nëntor isha në punë si zakonisht. Ishte shumë ftohtë dhe derën e dyqanit e mbaja të mbyllur. Rreth orës 18:00 hyn një djalë, i cili kërkoi t’i shërbeja dhe sjellja e tij për një produkt në lidhje me të dashurën e tij, të cilën e përshkruante për format trupore me fjalë jo etike”, tha ajo.
Më pas ajo thekson se 27-vjeçari është rikthyer sërish në dyqan, duke iu drejtuar vajzës me fjalë banale dhe më pas i ka kërkuar marrdhënie seksulae.
E reja e ka refuzuar e më pas, Marash Gjoklaj e ka dhunuar fizikisht duke tentuar që t’i marrë dhe telefonin që ajo mos të kërkonte ndihmë.
“Rreth orës 20:10 pasi pa që pranë dyqanit tim largohet roja e biznesit ngjitur, djali hyn përsëri në dyqan dhe në ato moment unë isha pranë tavolinës së punës. U afrua pranë meje duke mu drejtuar me një fjalor banal, duke kërkuar të kryente marrëdhënie seksuale me mua. Duke hasur në kundërshtimin tim ai më sulmoi duke më kapur nga flokët dhe duke më vënë dorën te goja. Tentoi të më fuste me forcë në magazinën e dyqanit. Në këto momente ndodhi përleshja fizike, duke tentuar të merrte edhe telefonin që unë të mos kisha mundësi të kërkoja ndihmë”, u shpreh ajo për News24.
Ajo tha se i shpëtoi nga duart dhe më pas u largua duke kërkuar ndihmë tek qytetarët që kalonin rastësisht aty. Më pas vajza e ka denoncuar të riun në polici.
“Ai u kap në banesë në prani të familjarëve të tij dhe nga kontrolli i banesës rezultoi xhupi të cilin e kishte veshur në të dyja sulmet. Pasi u bë përballja në ambientet e komisariatit nr 4, arrita ta identifikoja. Ai u shfaq, madje qeshte dhe ndërkohë konsumonte ujë. Aty mësova se ky person ishte dënuar për marrëdhënie seksuale me të mitura dhe gjykata e kishte liruar me kusht. Unë shpresoj që këtë herë gjykata edhe institucionet mos e bëjnë të njëjtën gjë, pasi frika ime më e madhe është se çfarë do të ndodhë me mua apo edhe më shumë vajza të tjera të cilat ndihemi të pasigurta në vendin tonë të punës”, tha vajza.
