Ka mbërritur te Spitali i Traumës, në Tiranë, 21-vjeçari Aldi Rama, që vrau me dy plumba në zemër oficerin e Krimeve të Rënda, 44-vjeçarin Saimir Hoxha.
Sipas informacioneve të marra portali “BalkanWeb” ka bërë të mundur sigurimin e pamjeve, që tregojnë momentin kur i riu nxirret nga ambulanca dhe futet direkt në sallën e reanimacionit, ndërsa kokën e ka të fashuar dhe mbahet me oksigjen, pasi ka qëlluar veten me armë në kokë.
Pak më herët, referuar burimeve nga Spitali i Lezhës,u raportua se 21-vjeçari është në vdekje klinike.
I riu ekzekutoi policin gjatë aksionit për zbulimin e parcelave me kanabis në Lezhë, ndërsa qëlloi veten me plumb në kokë pas disa orësh ndjekjeje nga Policia e Shtetit, FNSH dhe RENEA.
I rrethuar nga RENEA e FNSH, në aksion nga ajri dhe toka, 21-vjeçari Rama u vetëplagos rëndë dhe u dërgua me urgjencë në Spitalin e Lezhës, ndërsa pas marrjes së ndihmës së shpejtë, ai është nisur në gjendje të rëndë drejt Spitalit të Traumës në Tiranë. Menjëherë pas ngjarjes SHÇBA ka nisur hetimet për veprimet që kanë bërë kolegët e efektivit Saimir Hoxha të cilët ndodheshin me të në momentin që ky i fundit u qëllua për vdekje nga 21-vjeçari. Policët që ishin me Saimir Hoxhën do të duhet të japin disa shpjegime, për atë çfarë ndodhi para, gjatë dhe pas vrasjes së Samir Hoxhës.
Kujtojmë se policia pak më parë njoftoi se autori i krimit, 21-vjeçari, Aldi Rama ka qëlluar me armë veten dhe ndodhet në gjendje kritike për jetën. Po ashtu policia ka sekuestruar armën e krimit dhe telefonin e tij celular. Ngjarja e rëndë ndodhi paraditen e sotme në Ishull Lezhë.
