Mëngjesin e ditës së sotme, kryeministri Rama ka pasur një komunikim me gazetarët përgjatë vizitës së tij në Berlin. Ai u pyet për shumë tematika, por gjithashtu nuk mungoi theksi tek Orlando Rakipi djali i Aqif Rakipit, që u shpall ditën e djeshme “non grata” nga SHBA.
Kujtojmë që gjatë ditës së djeshme, ish-deputeti Aqif Rakipi, u fut në listën e personave të sanksionuar nga Thesari i Shtetit amerikan, pasi sipas DASH ka pasur kontakte me persona të botës së krimit, me qëllim blerjen e votave.
Rama nuk i shpëtoi pyetjes në lidhje me shpalljen non grata të Aqif Rakipit, në një kohë që djali i tij u fut në listat e PS-së.
Ndaj kësaj pyetje kryeministri nuk preferoi që të jepte një përgjigje duke thënë se këto “tema diskutohen në katund”, që nënkuptonte në këtë rast Shqipërinë.
Por kryeministri preferoi të qëndronte i “qetë” duke mos iu përgjigjur gazetarëve as për pyetjet e tyre në lidhje me diskutimet që mazhoranca do të ketë me opozitën, dhe se kë nga PD do të njohë partia që ai drejton.
“Të vijmë deri në Berlin dhe të flasim për kandidatët socialistë në Tiranë më duket pak e sforcuar, kalojmë te pyetja tjetër”, iu përgjigj Rama pyetjes për Orlando Rakipin, ‘vezën e artë’ që i solli mijëra vota socialistëve në qarkun e Tiranës, duke lënë jashtë Kuvendi socialistë të vjetër si Pandeli Majko, apo Mimi Kodheli, duke rrezikuar pozitat e tyre.
