Zana Cimili është korrespondentja e televizonit regjional N1 në Kosovë. Ajo është kërcënuar me jetë nëpërmjet rrjeteve sociale.
Kërcënimi i saj është pritur me shqetësim të madh nga Shoqata e Gazetarëve të Kosovës.
Personi i cili e ka kërcënuar gazetaren Cimili ka shkruar në gjuhën serbe në foton e postuar në rrjetin social Instagram. Në foton e postuar është vajza e gazetares, por komentuesi i ka shkruar në serbisht se ka dëshirë jetësore që të vrasë, të shqyejë një fëmijë shqiptar.
Ky person, identiteti i të cilit ka mbetur i panjohur, ka shkruar se pa problem do e kishte shqyer me dhëmbë një fëmijë shqiptari. E ndërsa për punën që bën gazetarja, ai e ka falenderuar.
Ai ka vazhduar të shkruajë me urrejtje duke thënë se shpreson se një ditë në Kosovë të shpëthejë luftë dhe që kësaj radhe terroristët dhe okupatorët shqiptarë të kenë mundësinë të ndjejnë gjithë atë zemërim të serbëve, dëshirën për drejtësi dhe liri!
Gazetarja Zana Cimili ka reaguar gjithashtu, duke e cilësuar të paparanueshme këtë lloj thirrjeje kërcënuese.
AKG ka theksuar se duhet vepruar menjëherë sepse reagimi i ngathët bën që rastet e këtilla të marrin hov, duke pas si qëllim futjen e frikës tek gazetarët.
