24% e familjeve shqiptare marrin borxh për t’u ushqyer. 23% kërkojnë hua për procedura mjekësore. Kostoja mujore e jetesës në Tiranë arrin 66,000 lekë pa qira.
Ndërkohë, një ushtri e tërë zyrtarësh shtetërorë, e shoqëruar nga kompani private sigurie dhe e transportuar me charter-a luksozë, po udhëton nëpër botë me paratë e po këtyre familjeve të varfra. Kryeministri Edi Rama po shpenzon miliona euro nga taksat e shqiptarëve për t’u kërkuar votën po atyre që i detyroi të emigrojnë.
“O hajdutë, kush ua ka paguar paratë që keni ardhur deri këtu me taku Edi Ramën? A keni turp? Ku i ke marrë paratë Pandeli Majko? Kush i ka paguar paratë Taulant Balla? Kryehajduti Alket Hyseni, kush i ka paguar paratë sot?” Thirrja e emigrantit që konfrontoi Benet Becin, kryetarin e Bashkisë së Koplikut, Pandeli Majkon, Taulant Ballën, Alket Hysenin etj. në Londër kap thelbin e një skandali që po zbulohet çdo ditë. Asnjë prej tyre nuk guxoi të përgjigjet.
Paradoksi bëhet edhe më i dhimbshëm kur përpara emigrantëve në Londër, kryeministri deklaron se “shqiptarët nuk ikin për arsyet që thuhen” dhe se janë thjesht “pjesë e trendit të lëvizjes siç kanë lëvizur dikur anglezët dhe irlandezët.” Një deklaratë që bie ndesh me realitetin e hidhur të shifrave: vetëm në dy vitet e fundit, 39 mijë shqiptarë kanë marrë leje qëndrimi për punë në BE, ndërsa në gusht u regjistruan 590 kërkesa për azil, niveli më i lartë që nga muaji maj.
Vizita e fundit në SHBA e zbulon më së miri strategjinë cinike të kryeministrit. I ftuar në festën private të ditëlindjes së Alex Soros dhe për të ndjekur një ndeshje basketbolli të NBA-së me bileta që kushtojnë deri në 8 mijë dollarë, kryeministri organizoi edhe një takim me diasporën për të justifikuar udhëtimin e kushtueshëm me charter. Asnjë transparencë nuk është bërë për kostot marramendëse të këtij udhëtimi që po paguhet nga xhepat e taksapaguesve shqiptarë.
Për të siguruar pjesëmarrje në këto takime elektorale, që kanë ndryshuar format nga stadiume në Athinë e Milano në holle hotelesh në Selanik, qeveria ka mobilizuar një ushtri të tërë zyrtarësh: kryebashkiakë, deputetë, drejtorë dhe punonjës administrate.
Të gjithë këta udhëtojnë dhe akomodohen me paratë e taksapaguesve shqiptarë, në një kohë kur pensionistët mbijetojnë vetëm falë remitancave që dërgojnë emigrantët. Madje pensionistët po financojnë pa dashje charter-at privatë dhe biletat e NBA-së të atyre që i detyruan fëmijët e tyre të largohen.
Në New York, organizator i takimit ishte Ylli Ujka, një individ që ka përfituar 370 dynym tokë nga qeveria Rama – një tjetër shembull i favoreve dhe klientelizmit që karakterizon këtë pushtet.
Kreu i degës së PD në Londër, Shkëlzen Rustemaj, e zbuloi qartë strategjinë: “Mbaruan votat nga Shqipëria, tani hambari i votave është diaspora. E gjithë qeveria dhe PS është në Londër. Një fushatë jashtëzakonisht e madhe.” Ai shtoi me të drejtë se “Ai i përzuri të gjithë këta shqiptarë dhe tani i përndjek dhe i intimidon edhe këtu.”
Skandali merr përmasa edhe më të mëdha me përdorimin e ambasadorëve si agjentë elektoralë të PS-së. Përfaqësuesit diplomatikë në SHBA, Kombet e Bashkuara, Itali, Gjermani, Greqi dhe Çeki janë kthyer në organizatorë të takimeve partiake, në shkelje flagrante të ligjit që dënohet me tre vjet burg. Kjo ka çuar në një kallëzim penal në SPAK nga kreu i grupit parlamentar të PD-së, Gazment Bardhi.
Pyetja e emigrantit në Londër mbetet pa përgjigje: “A keni turp?”
Është koha që institucionet e drejtësisë të hetojnë shpërdorimin skandaloz të parave publike për qëllime zgjedhore. Ndërsa shqiptarët largohen nga pamundësia ekonomike, arsimore dhe shëndetësore, kryeministri shpenzon paratë e taksapaguesve për t’u kërkuar votën pikërisht atyre që i detyroi të largohen nga vendi.
/gazetareforma.com
