Hipokrizia arriti kulmin sot, kur pas pensionit të posaçëm për familjen e Klodian Rashës, akorduar nga qeveria, kryebashkiaku Veliaj propozon t’i vihet emri i tij rrugës ku u vra. Kështu, rruga pranë shtëpisë së 25-vjeçarit, Klodian Rasha, do të mbajë emrin e tij.
Javës tjetër, në Këshillin e Bashkisë
Kryebashkiaku i Tiranës, Erion Veliaj, zbuloi sot, gjatë vizitës në një shtëpi të rindërtuar në Kashar, një detaj nga vizita që pati në familjen e të riut, gjatë së cilës babai i Klodianit, Qazimi, i ka kërkuar që emri i rrugës pranë shtëpisë të mbajë emrin e djalit të tij.
Veliaj u shpreh se dëshira e të atit do t’i shkojë për propozim Këshillit Bashkiak të Tiranës javën e ardhshme.
Sigurisht, që Klodian Rasha ishte një djalë i mirë për familje dhe rrethin e tij shoqëror, në atë rrugicë. Por vlerat e emrit të tij nisin pas vdekjes dhe lidhen vetëm me frymëzimin e protestave.
Ky djalë është frymëzuesi i protestave dhe për këtë e meriton jo një emër rruge, por edhe ndonjë shtatore. Por me motivacionin që i ka dhënë qeveria “vrasje aksidentale”, për të cilën i ka dhënë pensionin e posaçëm familjes, ky propozim i Veliajt është qesharak. Banorët e asaj rruge duhet të dinë motivacionin, përse i vihet emri “Klodian Rasha”.
Kriteret
Në bazë të Rregullores së Këshillit Bashkiak të Tiranës, ky organ vendos për emërtimin e rrugëve, të shesheve, të territoreve, të institucioneve dhe të objekteve në juridiksionin e Bashkisë.
Deri më sot, kriteret e vendosjes së emrave të rrugëve kanë përfshirë këto kategori:
-Emrat e njerëzve të shquar në historinë e popullit tonë në shekuj
-Emrat e rilindasve
-Emrat e firmëtarëve të Pavaresisë
-Emrat e heronjve të luftës dhe të punës të dëshmorëve të kombit
-Emrat e arsimtarëve dhe punonjësve të arsimit që kontribuan në Tiranë, në Shqipëri dhe në mbarë trojet shqiptare.
-Emrat e akademikëve dhe njerëzve të shquar në fusha të ndryshme si shkencë, industri, bujqësi, ekonomi, mjekësi etj
-Emrat e njerëzve të persekutuar padrejtësisht nga regjimi komunist, intelektualëve dhe figurave të spikatura që u persekutuan dhe u burgosën në diktaturë.
-Emrat e artistëve dhe këngëtarëve të njohur, njerëzve të kultureë dhe artit.
“Vrasja aksidentale nga policia” nuk është në mes të këtyre kritereve.
Klodian Rasha e meriton t’i vendoset emri dhe t’i kujtohet njerëzve dhuna e policisë, protestat që shpërthyen me emrin e tij. Nëse nuk nuk do të ketë një motivacion të tillë, atëherë është një veprim në vazhdën e manipulimeve që janë bërë në këtë çështje nga qeveria, që nga dita e vrasjes deri më sot.
/GazetaReforma.com/
