Në natën mes të shtunës dhe të dielës, më 30 mars 2025, akrepat e orës do të zhvendosen 60 minuta përpara, duke shënuar kalimin në orën verore.
Ky ndryshim do të ndodhë në 02:00 të mëngjesit, kur ora do të kalojë direkt në 03:00, si pjesë e sistemit të kursimit të energjisë.
Orari veror u zbatua për herë të parë gjatë Luftës së Parë Botërore dhe është përdorur gjerësisht që nga viti 1972, me synimin për të shfrytëzuar më mirë dritën natyrore dhe për të reduktuar konsumin e energjisë elektrike.
Megjithatë, me përparimin teknologjik, ky qëllim është bërë më pak efektiv, pasi rritja e përdorimit të ajrit të kondicionuar mund të çojë në një konsum më të lartë të energjisë, duke krijuar një efekt të kundërt.
Ekspertët paralajmërojnë se ky ndryshim mund të ketë ndikime negative në shëndetin e njeriut.
Sipas Beth Ann Mallou, profesoreshë e Neurologjisë dhe Pediatrisë në Universitetin Vanderbilt, kalimi në orën verore mund të shkaktojë lodhje, irritim, ulje të performancës mendore dhe fizike, çrregullime të urisë dhe një rrezik më të lartë për sulme në zemër, goditje në tru, migrenë dhe aksidente trafiku.
Sipas Akademisë Amerikane të Mjekësisë së Gjumit, 55% e të rriturve ndihen të lodhur pas ndryshimit të orës.
Kjo lidhet me faktin se ndryshimi i papritur në ciklin e gjumit ndikon në prodhimin e melatoninës, hormonit që rregullon gjumin, duke vonuar sekretimin e tij për shkak të ekspozimit më të gjatë ndaj dritës natyrore.
Ndërkohë që shumë vende vazhdojnë ta zbatojnë orën verore, debati mbi përfitimet dhe pasojat e saj mbetet i hapur.
