Një 29-vjeçar shqiptar, i njohur me disa emra si Alfons Taraj, Afons Bibaj dhe Alfons Cani, është arrestuar në Shqipëri me qëllim për t’u ekstraduar dhe për tu përballur me drejtësinë në Itali. Ai është shpallur në kërkim ndërkombëtar dhe rezulton të jetë dënuar me mbi 10 vjet burgim për pesë vepra penale të rënda, përfshirë tentativën për vrasje.
Sipas zyrtarëve të policisë, “Drejtoria e Forcës së Posaçme Operacionale në Departamentin e Policisë Kriminale në DPPSH ka përfunduar me sukses operacionin e koduar ‘Operacionalja 6’. Ky megaoperacion, i njohur si ‘Sundimi i ligjit’, u realizua në bashkëpunim të ngushtë mes Interpol Tiranës dhe Interpol Romës.”
Gjykata e Monzas në Itali ka vendosur dënimin e tij në 10 vjet, 2 muaj dhe 11 ditë burgim për vepra të ndryshme kriminale. “Ky shtetas do të ekstradohet në Itali për të vuajtur dënimin e tij, pasi të përfundojnë procedurat ligjore,” theksoi një zëdhënës i policisë.
