Polica vijon të ketë nën monitorim të fortë shoferët.
Mbrëmjen e djeshme, gjatë kontrollit me radar, në aksin Sauk-Teg në Tiranë janë hequr 9 leje drejtimi për vetëm 3 orë.
Sipas policisë, shpejtësi e tyre varionte nga 140-173 km/h, gati dy herë më shumë se tabelat.
Ndonëse kontrollet e policisë janë shtuar, ka ende shumë shoferë që abuzojnë në drejtimin e makinave.
Më herët është paralajmëruar se një masë e rë do merret nga Policia Rrugore.
Shoferët do t’i nënshtrohen edhe testit të drogës.
Njoftimi i policisë
“Vijon kontrolli me Radar për të parandaluar shpejtësinë tej normave të lejuara. Për 200 minuta kontroll me radar duke i monitoruar nga mbikalimi, 9 Leje drejtimi të tërhequra dhe dërguar në OASH, për shpejtësi 140 km/h – 173 Km/orë. Shpejtësi avioni gati dy herë më shumë se tabela, rrezik potencial për aksident. Edhe pse kontrollet me radar janë shumëfishuar jo vetëm në Tiranë por në gjithë rrugët nacionale, pavarësisht se në fundjavë kontrollet janë akoma më të shtuara, fushatat sensibilizuese përditë e më shumë, përsëri ka akoma shumë drejtues mjetesh qe abuzojnë duke përdorur makinën si avion. Mos shpejtoni se në rastin më të mirë Radari dhe Polici Rrugor ju presin, në rastin më të keq ju pret aksidenti. Viti 2020, viti i sigurisë rrugore, të parandalojmë në maksimum aksidentet me pasojë jetën dhe kjo do arrihet me kontributin e të gjithë, ndaj mos fluturo, ndërgjegjësohu dhe zbato rregullat e qarkullimi rrugor. Bashkë për sigurinë rrugore.”
