Më në fund, pas 3 muajsh i pezulluar transporti publik në të gjithë vendin do rihapet më 15 qershor.
Lajmin e ka bërë me dije ditën e djeshme Ministria e Infrastrukturës dhe Energjisë, me anë të një njoftimi zyrtar, ku informon se nga java që vjen rifillon transporti publiku sipas protokollit të miratuar nga ISHP.
Menjëherë pas këtij lajmi, ditën e sotme, Shoqatat e Transportit Urban dhe Ndërurban u grumbulluan para Ministrisë së Infrastrukturës, ku kërkuan mbështetjen e qeverisë, pasi në të kundërt paralajmëruan rritjen e çmimeve të biletave.
Së fundmi, kryeministri Edi Rama ka reaguar rreth kësaj çështjeje.
Përmes një statusi në Facebook, Rama paralajmëron të gjithë kompanitë që të mos rrisin çmimet e biletave për qytetarët, pasi thotë se qeveria do ta mbështesë këtë sektor duke njohur si shpenzim të zbritshëm të 100% të konsumit të naftës, duke hequr taksat dhe tarifën vendore deri në 31 dhjetor 2020.
“Të hënën 15 qershor rinis shërbimi i transportit urban dhe ndërurban, sipas protokollit të miratuar të sigurisë shëndetësore. Qeveria do ta mbështesë këtë sektor përmes:
njohjes si shpenzim të zbritshëm të 100% të konsumit të naftës
• zero taksa dhe po ashtu zero tarifa vendore deri në 31 dhjetor 2020. Brenda 2020 do të kryhet reforma e plotë ligjore/fiskale e sektorit dhe në 1 janar 2021 do të nisë zbatimi i saj me biletën elektronike si hap i parë. Ndalohet kategorikisht rritja e çmimit të biletës për qytetarët,”– shkruan Rama.
