Një ngjarje e rëndë ka ndodhur këtë të diel në plazhin e Tales, në Lezhë, ku një pushues ka humbur jetën pasi u mbyt në det.
Sipas dëshmive të pushuesve të pranishëm, viktima ishte duke u larë kur papritur është parë në vështirësi, duke gëlltitur ujë.
Të alarmuar, pushuesit kanë ndërhyrë menjëherë dhe kanë arritur ta nxjerrin në breg me shenja jete. Megjithatë, ai dyshohet se ka ndërruar jetë gjatë transportimit për në spital.
Dëshmitarët kanë pohuar se ka pasur vonesë në mbërritjen e ambulancës, vonesë e cila mund të ketë ndikuar në përkeqësimin e situatës.
Në vendngjarje ndodhen forcat e policisë dhe grupi hetimor, të cilët po punojnë për zbardhjen e plotë të rrethanave dhe shkaqeve të kësaj ngjarjeje të rëndë.
