Një ngjarje tragjike ka ndodhur këtë pasdite në lagunën e Patokut në Kurbin, ku dy të rinj 16-vjeçarë u futën për t’u larë nëpërmjet kanalit që lidh lagunën me detin Adriatik.
Sipas burimeve zyrtare nga Policia, njëri prej adoleshentëve është nxjerrë nga uji në gjendje të rënduar dhe është transportuar me urgjencë në spital për trajtim mjekësor.
Ndërkohë, shoku i tij nuk ka mundur të dalë nga uji dhe dyshohet se është mbytur. Pavarësisht përpjekjeve të deritanishme, trupi i tij nuk është gjetur ende.
Në vendin e ngjarjes ndodhen forca të Komisariatit të Policisë së Kurbinit, Policia Kufitare dhe është kërkuar ndërhyrja e polumbarëve të RENEA-s për të vijuar operacionin e kërkimit në zonën ku ndodhi incidenti.
Grupi hetimor ka nisur hetimet për të sqaruar plotësisht rrethanat e kësaj ngjarjeje të rëndë që ka tronditur komunitetin lokal.
