Për shkak të shtimit të rasteve të reja me Covid-19 dhe numrit të viktimave, në Itali janë rikthyer masat e reja kufizuese për të parandaluar përhapjen e mëtejshme.
Ditën e sotme qeveria italiane vendosi masa të reja finaciare në mbështetje të sektorëve ekonomikë dhe familjeve që janë prekur nga këto masa kufizuese.
Sipas mediave italian shuma e këtyre masave nuk është njoftuar ende në komunikatën zyrtare, por llogaritet në një shumë prej rreth 2,5 miliardë euro.
Masat financiare të vendosura parashikojnë, mes të tjerash, një fond që do të financojë në mënyrë automatike aktivitetet ekonomike të rajoneve që duhet të kufizohen gjithashtu, një fond për të kompensuar humbjet e dyqaneve të vendosura në qendrat tregtare, pasi këto të fundit janë të mbyllura në fundjavë.
Që nga fillimi i pandemisë e deri më tani në Itali janë regjistruar më shumë se 40 000 të vdekur për më shumë se 820 000 raste, prandaj qeveria po përpiqet të frenojë përhapjen e epidemisë duke marrë masa të lokalizuara për të shmangur një rikufizim të përgjithshë, ashtu si në pranverën e kaluar, me kosto sociale dhe ekonomike shumë të larta.
