Ditën e sotme gjykata administrative ka shtyrë seancën për shqyrtimin e kërkesë padisë të prindërve të kopshtit ‘Zybejde Hanem’.
Ndërkohë që Avokati i 50 prindërve Franc Terihani kërkoi përjashtimin e gjyqtares Afërdita Maho me pretendimin se ajo është shprehur njëherë për kërkesën e padisë së “Turgut Ozal”. Të njëjtën kërkesë depozitoi edhe avokati i Turgut Ozal, Isuf Shehu, i cili është palë e tretë në këtë proces.
Në një komunikim për mediat, avokati u shpreh se kanë kërkuar anulim të vendimit për mbylljen e kopshtit si edhe për përjashtimit e gjyqtares.
Gjithashtu theksoi se edhe vetë gjyqtarja ka kërkuar të heqë dorë nga çështja.
Bëhet e ditur se shqyrtimi i kësaj kërkesë do bëhet nga nje trupë tjetër gjyqësore më datë 9 nëntor në orën 13:30.
“Kërkojmë përjashtimin e gjyqtares! Fëmijët duhen sistemuar sepse ata e kanë zgjedhur vetë institucionin përkatës për tu arsimuar, është e pamundur që të transferohen në një institucion privat sepse kanë dhënë përgjigjie negative. Kemi pasur madje dhe raste kur institucione publike paraarsimore kanë refuzuar. Kërkuam anulimin e vendimit për mbylljen e kopshtit. Gjyqtarja është shprehur një herë për çështjen”-u shpreh Terihani.
“Të mos u shkaktohen më trauma fëmijëve, ne si prindër duam ti mbrojmë nga dëmi psikologjik, ato nuk e kuptojnë dot pse është mbyllur kopshti”– tha një nga prindërit.
