Ndërkohë që një pjesë e studentëve, ku janë vërejtur edhe studentë të forumeve partiake, protestojnë përpara Ministrisë së Arsimit, ku kundërshtojnë mbylljen e universiteteve dhe mësimin online, një grupim tjetër studentësh, “Lëvizja për Universitetin”, ka bërë një aksion përpara objektit të Kryeministrisë, për të treguar se kanë mbetur në mes të katër rrugëve pas vendimit për mbylljen e auditorëve.
Ata janë shprehur se mijëra studentë e patën të pamundur ta ndiqnin normalisht procesin mësimor online një vit më parë, si pasojë e mungesës së mjeteve teknike dhe aksesit në internet.
Nëntë muaj më vonë, e njëjta situatë rrezikon të përsëritet. Mësimi online vazhdon të jetë i pamundur për shumicën e studentëve, qiratë janë rritur, kostot e jetesës po ashtu, karta studentore nuk funksionon, abone nuk ka, shërbime sociale e shkollore jo e jo. Ndërkohë qeveria në vend që të lehtësojë barrën e studentëve, i mban të larta tarifat e studimit dhe jep urdhër që konviktet të boshatisen nga studentët”, kanë deklaruar studentët e “Lëvizjes për Universitetin”.
Të ndodhur në këto kushte, këta studentë kanë kërkuar një paketë sociale për qiratë, internetin, librat dhe kostot e jetesës. “Në të kundërt, në kushtet e keqshkollimit dhe papunësisë, mungesës së strehimit dhe parave, do të vijmë̈ me mijëra studentë të tjerë, bashkë me valixhe, rroba, këpucë, libra dhe tenxhere në kryeministri.
Nëse kryeministria vazhdon të mbetet shtëpi e oligarkëve në kohë krize, ne do ta kthejmë̈ në vatër të studentëve, punëtorëve, pensionistëve dhe qytetarëve të prekur nga pandemia. Kupa është mbushur dhe nuk mban më”, kanë paralajmëruar studentët.
KOMUNIKATË PËR SHTYP E LËVIZJES PËR UNIVERSITETIN
Që prej karantinës së muajit mars studentët kanë qenë një nga shtresat më të dëmtuara të shoqërisë. Po qeveria nuk ka menduar asnjë çast për ta.
Mijëra studentë e patën të pamundur ta ndiqnin normalisht procesin mësimor online si pasojë e mungesës së mjeteve teknike dhe aksesit në internet. Mijëra të tjerë mbetën të papunë. Shumë mbetën të pastrehë në pamundësi për të punuar dhe paguar qiratë.
Nëntë muaj më vonë, e njëjta situatë rrezikon të përsëritet. Mësimi online vazhdon të jetë i pamundur për shumicën e studentëve, qiratë janë rritur, kostot e jetesës po ashtu, karta studentore nuk funksionon, abone nuk ka, shërbime sociale e shkollore jo e jo. Ndërkohë qeveria në vend që të lehtësojë barrën e studentëve, i mban të larta tarifat e studimit dhe jep urdhër që konviktet të boshatisen nga studentët.
Prandaj ne kemi ardhur këtu, përpara kryeministrisë, për të kërkuar:
- Përgjysmim të tarifës vjetore të studimit, dhe
- Një paketë sociale për qiratë, internetin, librat dhe kostot e jetesës.
Në të kundërt, në kushtet e keqshkollimit dhe papunësisë, mungesës së strehimit dhe parave, do të vijmë me mijëra studentë të tjerë, bashkë me valixhe, rroba, këpucë, libra dhe tenxhere në kryeministri.
Nëse kryeministria vazhdon të mbetet shtëpi e oligarkëve në kohë krize, ne do ta kthejmë në vatër të studentëve, punëtorëve, pensionistëve dhe qytetarëve të prekur nga pandemia.
Kupa është mbushur dhe nuk mban më.
#PërUniversitetin
#PërShoqërinë
Kërkesat e studentëve që protestojnë përpara Kryeministrisë:
- Mësim i alternuar, online dhe në auditore! Leksionet online ndërsa seminaret në auditore.
- Rimbursim i pagesave të konvikteve dhe të qirave
3.Paketat e internetit falas dhe të dedikuara për studentët
- Mundësimi i pagesave teknologjike të nevojshme për studentë që nuk kanë akses në mësim online./GazetaReforma.com/
