Përhapja e Covid-19 në vendin tonë ka bërë që shkolla 9-vjeçare “Sotir Gura” në Korçë të mbyllet pasi shtatë mësues dhe disa nxënës kanë rezultuar pozitiv me koronavirus.
Me anë të një njoftimi në Facebook, drejtuesit e shkollës kanë njoftuar se shkolla është mbyllur pasi po dezinfektohen ambientet e saj për t’u siguruar se virusi nuk do të përhapet edhe më shumë.
Pas rasteve pozitive, testit të tamponit i janë nënshtruar dhe anëtarët e tjerë të stafit të kësaj shkolle dhe përgjigjja e tyre pritet të dalë në ditët në vijim.
Kujtojmë se ditën e djeshme në vendin tonë janë kryer 1278 testime në 24 orët e fundit, nga të cilët kanë rezultuar pozitivë 284 qytetarë të prekur nga virusi SARS-COV2.
Janë shëruar 103 qytetarë, duke e çuar në 10808 numrin e të shëruarve në vend që prej fillimit të epidemisë.
