Protesta e mbajtur ditën e sotme para kryeministrisë, kundër rritjes së çmimit të energjisë elektrike, karburanteve dhe çmimeve të produkteve jetike është mbyllur.
Aktivisti Adriatik Lapaj ka bërë me dije se protesta e radhës do të mbahet ditën e hënë në orën 17:00. “Duke qenë se katër ditë më parë unë thash rastësisht do shkoj të protestoj dhe çuditërisht u bashkuan mijëra veta. Unë personalisht pa ja imponuar asnjë tjetri, në demokraci dhe vullnet të plotë, do lë disa ditë kohë për të reflektuar mbi protestën time dhe do protestoj sërish ditën e hënë në orën 17:00. Ndoshta rastësisht bëhemi ditën e hënë më shumë dhe se sot, ndoshta rastësisht“, tha Lapaj.
Kujtojmë se protesta e ditës së stome është thirrur në rrjetet sociale dhe disa qytetarë janë mbledhur para kryeministrisë për të protestuar. Të dielën më 3 tetor, kryeministri Edi Rama doli në një deklaratë ku lajmëroi se Shqipëria do të preket nga kriza energjetike, ashtu siç ka ndodhur edhe në vendet e tjera të botës. Rama tha se kjo do të shoqërohet edhe me rritje të çmimeve, ndërsa nuk paraqiti asnjë plan masash për të përballuar situatën e për t’u ardhur në ndihmë qytetarëve.
Ndërkohë, prej disa javësh çmimi i bukës në Shqipëri është rritur, ashtu si edhe çmimi i kafes e i produkteve të tjera. Po ashtu është rritur ndjeshëm edhe çmimi i karburanteve dhe pritet të rriten edhe çmimet e të tjera produkteve.
