Pasditen e sotme u mbajt në Tiranë dita e gjashtë e protestës për vrasjen e 25-vjeçarit Klodian Rasha nga policia.
Protesta e sotme duket që ka qenë paqësore, e shtensionuar nga të dyja palët si nga policët ashtu edhe nga të rinjtë, si dhe pa incidente.
Protestuesit kanë marshuar paqësisht nën thirrjet në kor si: “Rama ik”, “Poshtë diktatura” dhe “Lironi djemtë tanë”.
Ndërkohë Policia nga ana tjetër kishte marrë masa të rrepta sigurie, kontrolle të imtësishme që në hyrje të sheshit “Skënderbej” dhe kontrollet me karta identiteti. Në disa objekte të rëndësisë së veçantë u vendosën kordona policie, përfshirë edhe përpara godinës së Kryeministrisë. Gajatë protestës së sotme nuk është shënuar asnjë incident si dhe nuk ka pasur përballje mes demonstruesve dhe policisë.
Të vetmet thirrje kanë qenë ata për lirimin e protestuesve të tjerë, që po mbahen në izolim. Protestuesit më shumë qëndruan pranë Ministrisë së Brendshme.
Demonstrata nisi me vonesë për shkak edhe të kontrolleve të policisë dhe ka qenë shumë e qetë pasi nisi si tubim paqësor, grupe – grupe, jo më shumë se 10 persona.
Një grup qytetarësh bënë thirrje që të marshojnë edhe përpara Kryeministrisë.
Pranë Ministrisë së Brendshme kanë qëndruar shumë policë duke krijuar disa kordona sigurie.
Pas protestave të dhunshme disa ditore, kemi një shtensionim të situatës nga të dyja palët, edhe nga policia, edhe nga protestuesit.
Gjatë protestës së sotme u vu re edhe pjesëmarrja e personave të moshave të ndryshme dhe jo vetëm të rinjve apo adoleshentëve./Gazetareforma.com/
