Përhapja e koronavirusit në institucionet shtetërore në vend nuk ka të ndalur.
Përsëri institucionet shtetërore në Vlorë janë detyruar të mbyllin dyert për shkak të pandemisë dhe përhapjes së saj në stafin e punonjësve.
Këtë herë Agjencia e Zonave të Mbrojtura në Vlorë është mbyllur, pasi dy punonjës të këtij institucioni janë konfirmuar pozitivë në analizat e koronavirusit.
Ky institucion do të qëndrojë i mbyllur për 14 ditë, ndërkohë që është karantinuar edhe pjesa tjetër e stafit të punonjësve.
Kujtojmë se dy ditë më parë u njoftua për mbylljen e Gjykatës së Apelit në Vlorë dhe një pjesë e institucionit të AKU-së për shkak të rritjes së numrit të të infektuarve me Covid-19.
Kjo pasi në Gjykatën e Apelit të Vlorës, një person i punësuar ka rezultuar i infektuar me koronavirus.
Ndërkohë sot u raportua për dy humbje jete nga Covid-19 duke e çuar në 232 numrin total të jetëve të humbura që nga fillimi i pandemisë. Dhe u raportua për 155 raste të reja, rekordi më i ri që nga fillimi i pandemisë.
