Fermerët e Dibrës, të goditur rëndë nga ngricat që dëmtuan plotësisht hektarë me pemë frutore në fazën e lulëzimit, iu drejtuan Drejtorisë së Bujqësisë për ndihmë dhe mbështetje. Por, në vend të zgjidhjeve apo angazhimit institucional, u përballën me indiferencë dhe braktisje, madje edhe me arrogancë.
Situata agravoi kur një prej fermerëve ngriti zërin për mungesën totale të reagimit nga agronomët apo specialistët e institucionit. Në vend të përgjigjes, një zyrtar i drejtorisë i vuri gishtin në gojë fermerit, duke i kërkuar të heshtë.
“Na thonë të pushojmë, asnjë nuk ka ardhur të na pyesë çfarë kemi pësuar,” tha një prej fermerëve të prekur. “Duan të marrim thesin në shpinë e të ikim jashtë, sepse nuk u intereson më vota jonë. Askush nuk është interesuar nëse jemi gjallë apo jo. Jam i pesti në familje, mbaj veten me këtë bujqësi. Të paktën të më rimbursojnë shpenzimet, nuk po kërkoj milionat që të rri në shtëpi.”
