Një 40-vjeçar në Tiranë ka rënë në prangat e policisë pasi ka ushtruar dhunë fizike dhe psikologjike ndaj prindërve të tij.
Bëhet me dije se shtetasi me inicialet R.XH e kishte nisur sulmin ndaj prindërve pasi ata e kallëzuan në polici për dhunën e vazhdueshme që ai ushtronte ndaj bashkëshortes.
Në gjendje të droguar, 40-vjeçari i ka kërcënuar prindërit me thikë, teksa policia ka bërë të mundur arrestimin në kohë të tij, duke parandaluar në këtë mënyrë një krim të mundshëm në familje.
Njoftimi i policisë:
Parandalohet një ngjarje e mundshme kriminale në familje.
Nën efektin e lëndëve narkotike, ushtroi dhunë fizike ndaj prindërve të tij dhe i kanosi ata me mjet prerës (thikë), arrestohet në flagrancë 40-vjeçari.
Specialistët e Seksionit për Hetimin e Krimeve në Komisariatin e Policisë Nr. 3, pas kallëzimit të marrë nga shtetasi R. Xh., se djali i tij ushtronte dhunë fizike në mënyrë të vazhdueshme ndaj tij dhe bashkëshortes, si dhe i kishte kanosur ata me mjet prerës (thikë), menjëherë kanë organizuar punën, duke kapur dhe shoqëruar në ambientet e Policisë, djalin e tij, shtetasin T. Xh., 40 vjeç, banues në Tiranë.
Në vijim të veprimeve hetimore, u arrestua në flagrancë shtetasi T. Xh., pasi dyshohet se në mënyrë të vazhdueshme, nën efektin e lëndëve narkotike, ka ushtruar dhunë fizike dhe psikologjike ndaj prindërve të tij dhe i ka kanosur ata me mjet prerës thikë.
Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.
