Rusisë po i kushton shtrenjtë nisja e luftës me Ukrainën, në përpjekje për ta pushtuar atë. Shumë vende të botës dhe organizma ndërkombëtare kanë vendosur sanksione ndaj Rusisë dhe ndër to edhe Mbretëria e Bashkuar.
Ndërkohë sot Mbretëria e Bashkuar njoftoi sanksione të reja që synojnë të bllokojnë kompanitë ruse nga aksesi në industrinë e aviacionit dhe hapësirës në tregun britanik të sigurimeve.
“Kompanitë ruse në industrinë e aviacionit apo hapësirës do të pengohen të përdorin shërbimet e sigurimit ose risigurimit me bazë në Mbretërinë e Bashkuar ka njoftuar sot Qeveria e Mbretërisë së Bashkuar, në përgjigje të pushtimit të Ukrainës nga Rusia”, thuhet në një deklaratë të lëshuar nga Zyra e Thesarit e Mbretërisë së Bashkuar.
“Në ndërmarrjen e një veprimi të tillë, Mbretëria e Bashkuar po demonstron përkushtimin e saj për të aplikuar sanksione të rënda ekonomike në përgjigje të pushtimit rus të Ukrainës”, vazhdon më tej deklarata.
Theksojmë se aviacioni ka qenë një nga sektorët që është goditur në Rusi, pasi i janë vënë sanksione, duke pezulluar shumë linja fluturimi që vijnë nga ky shtet.
Kujtojmë se ditën e sotme pritet të zhvillohet raundi i dytë i negociatave, me shpresën se mund të arrihet një armëpushim. Dita e sotme shënon një javë që nga fillimi i pushtimit rus.
