Kryeministri Edi Rama dhe ai i Kosovës, Albin Kurti nënshkruan marrëveshjet ndërqeveritare.
Në përfundim të mbledhjes së dy qeverive në Elbasan, janë nënshkruar marrëveshjet e bashkëpunimit mes qeverisë së Shqipërisë dhe Kosovës.
Marrëveshjet janë nënshkruar nga ministrat e dy qeverive.
Në mbledhjen e sotme ministri i Brendshëm Bledi Çuçi, theksoi se për qytetarët e Kosovës që duan të festojnë pavarësinë e Shqipërisë dhe Festën e Flamurit këtë fundjavë nuk do të ketë asnjë pengesë.
Albin Kurti, në konferencën e përbashkët me kryeministrin Edi Rama u shpreh se marrëveshjet ne nënshkruara ditën e sotme mes dy qeverive do të forcojnë më shumë dy shtetet.
“Mbledhja e sotme është një hap i madh. Nëpërmjet marrëveshjeve të nënshkruara do të rrisim edhe më tej bashkëpunimi për më shumë mirëqenie zhvillim për shqiptarët në të dy anët e kufirit. Marrëveshjet janë me rëndësi ekonomike e kulturore. Bashkëpunimi do të forcojmë marrëdhëniet tona. marrëveshjet janë në horizontin e integrimit europian. Marrëveshje si këto sot do mundësojnë që vizionet ti përkthejmë në veprime konkrete. Gjithashtu gjatë ditës së sotme do të diskutojmë për veprime konkrete për të vlerësuar bashkëpunimin ekonomik të deritanishëm. Lidhshmëria janë gjuhësore, kulturore janë nyje të forta historike”, tha Kurti.
Ndërsa kryeministri Edi Rama në konferencë pohoi se në pikat kufitare mes dy vendeve do të aplikohet një regjim i ri, monitorim përmes kamerave dhe pa kontrolle fizike.
“Gazetarët tirana kanë ardhur këtu në Elbasan, për të ndjekur nga afër këtë mbledhje të 7 ndërqeveritare mes dy vendeve. Besoj i ndoqët rezultatet e këtij takimi që është përgatitur me intensitet të posaçëm. U takuam në Prishtinë dhe ramë dakord për piketat e takimit. Kemi firmosur një sërë marrëveshjesh konkrete, ku pa dashur që të marrë kohë të tepërt, të nënvizoja marrëveshjen e bërë për studimin e fizibilitetit të hekurudhës Durrës-Prishtinë. Të dyja qeveritë kanë përcaktuar në buxhetin e 2022-it, një fond, të dyja ministritë kanë dakordësuar për ngritjen e ekipit të përbashkët të punës. Po ashtu dua të nënvizojë marrëveshjen që çon në një nivel të ri bashkëpunimin doganor, një kërkesë legjitime e kahershme e kohës, e eksportuesve dhe importuesve në të dy anët e kufirit, të cilët do të jenë përfituesit e drejtpërdrejtë. Më tutje nënvizoj se eliminimi i procedurave të dyfishta është objektiv i yni në të gjithë sektorët. Krijimi i manualit të ri për operimin në doganën e Durrësit, është kyçi për të ngritur në një nivel tjetër lëvizjen e lirë. E treta dua të nënvizojë, pasi është dhe lajm i mirë për të gjithë qytetarët nga të dy anët, veçanërisht për qytetarët e Kosovës të cilët vërshojnë në ditë festash apo në sezon veror në Shqipëri, është dakordësuar një regjim i ri doganor për ta në kufi, duke parasysh që mos të ketë radhë të dyfishtë.”
