Rastet globale të koronavirusit tejkaluan 100 milion ditën e sotme, ndërsa vendet në të gjithë botën luftojnë me variante të reja virusi dhe mungesa të vaksinave.
Pothuajse 1.3% e popullsisë së botës tani është infektuar me COVID-19 dhe më shumë se 2.1 milion njerëz kanë vdekur. Një person është infektuar çdo 7.7 sekonda, mesatarisht, që nga fillimi i vitit. Rreth 668,250 raste janë raportuar çdo ditë gjatë së njëjtës periudhë, dhe niveli global i fatalitetit qëndron në 2.15%.
Vendet e prekura më rëndë janë: Shtetet e Bashkuara, India, Brazili, Rusia dhe Mbretëria e Bashkuar të cilat përbëjnë më shumë se gjysmën e të gjitha rasteve të raportuara COVID-19 por përfaqësojnë 28% të popullsisë globale, sipas një analize të Reuters.
Botës iu deshën 11 muaj për të regjistruar 50 milion rastet e para të pandemisë, krahasuar me vetëm tre muaj që rastet të dyfishoheshin në 100 milion.
Rreth 56 vende kanë filluar vaksinimin e njerëzve për koronavirusin, duke administruar të paktën 64 milion doza. Izraeli udhëheq botën në vaksinat për frymë, duke vaksinuar 29% të popullsisë së tij me të paktën një dozë.
Ndërkohë Ministria e Shëndetësisë në vendin tonë deklaroi sot se janë konfirmuar 876 raste të reja me koronavirus. Gjithashtu, në spitalet dedikuar Covid-19 në Tiranë kanë ndërruar jetë 7 qytetarë. Betejën me virusin e rrezikshëm e kanë fituar 503 qytetarë gjatë 24 orëve të fundit.
