Anija “Moliva”, e cila mbart 102 kontejnerë me mbetje të rrezikshme, ka mbërritur në Portin e Durrësit dhe po kryen procedurën e ankorimit për të filluar shkarkimin e ngarkesës.
Autoritetet portuale dhe policia, pas një mbledhjeje të zhvilluar një ditë më parë, kanë vendosur që kontejnerët të transportohen në një zonë të sigurt në Porto Romano, ku do të mbikëqyren 24 orë nën kërkesën e Prokurorisë së Durrësit.
Pas transportimit të kontejnerëve në këtë hapësirë të sigurt, pritet të kryhet marrja e kampionëve nga secili kontejner për analizë në një laborator të specializuar, me qëllim verifikimin e përmbajtjes së mbetjeve.
Anija, e cila mbërriti në Durrës më 28 tetor pasi ngarkesa e saj u refuzua nga autoritetet tajlandeze, ka qëndruar në pritje për më shumë se 10 ditë në radën e portit. Kapiteneria e Portit, e kontaktuar nga News24, ka konfirmuar se është në dijeni të vendimit, por është ende në pritje të shkresës zyrtare nga Autoriteti Portual për të lejuar hyrjen e anijes në port dhe nisjen e shkarkimit.
