Hedhja e mbetjeve plastike në vendet e papërshtatshme vazhdon të mbetet një problem shqetësuese në gjithë vendin.
Pamjet nga kanali i Bishqethemit në Lushnje janë të frikshme, pasi kanali është mbushur me qese plasmasi e bidona plastike duke e bllokuar tërësisht atë.
Bashkë me mbetjet plastike, uji i kanalit sjell kafshë të ngordhura, duke rrezikuar të kthehet në një vatër infeksioni tashmë që stina e verës ka nisur, raporton Top Channel.
Padyshim më të prekurit nga kjo situatë janë banorët që jetojnë përgjatë këtij kanali, të cilët thonë se kjo situatë ndodh çdo vit sa herë që fillon vaditja dhe kanali mbushet me ujë.
Sipas tyre këto mbeturina përfundojnë këtu, por zanafillën e kanë nga fshatrat e Krutjes, ku banorët i hedhin në kanal e më pas uji i i nxjerrë në këtë pikë.
Edhe pse kjo situatë është e përsëritur shpesh herë nuk ka marrë zgjidhje për banorët.
Kujtojmë se ndotja e mjedisit, por sidomos lumenjve është një problem i mprehtë për vendin tonë.
Disa ditë më parë, pamje shqetësuese janë publikuar edhe nga ujërat e lumit Drin që përshkojnë qytetin e Lezhës.
Nga ngjyra e tyre dallohet qartë se nuk ka një rrjedhë të vazhdueshme, ndërsa aroma e pakëndshme ka shkaktuar problematike për banorët.
Nga një mundësi për turizmin dhe për zhvillimin ekonomik të Lezhës, ai është kthyer në një ujëmbledhës të ujërave të zeza, të mbetjeve të ndryshme urbane si edhe të mbetjeve industriale duke u kthyer kështu në një shqetësim për banorët e Lezhës.
Deri tani askush nuk është kujtuar se kush i ka hedhur këto mbetje, sa herë janë kontrolluar lumenjtë, përse nuk janë pastruar?
Situata bëhet edhe më serioze me fakti se një panoramë e tillë paraqitet edhe në lumenjë të tjerë, si grykëderdhja e Ishmit, baseni i përroit të Arbanës, Qesarakës etj.
Veç plastikës që dominon në këto basene, nuk mungojnë mbetjet spitalore dhe ato inerte si në basenet e këtyre lumenjve ashtu edhe në grykëderdhjen e Adriatikut, në plazhin Adriatik dhe kepin e Rodonit.
