Një autokolonë me 300 ton ndihma për tërmetin, kryesisht me materiale ndërtimi, u nis në mëngjes nga Sarajeva për në Shqipëri.
Siç raporton “Anadolu Agency”, ndihmat u mblodhën nga organizata “Pomozi.ba”.
Themeluesi i kësaj organizate, Elvir Karaliç, tha se aksioni për mbledhjen e ndihmave ka filluar një muaj më parë.
Fillimisht ishin mbledhur ushqime, dyshekë, tenda dhe veshje, por pas konsultimit me shtabin e emergjencave në Durrës, 270 ton ndihma u zëvendësuan me materiale ndërtimi.
“U informuam se materiali ndërtimor është më i domosdoshëm ashtu që zhvendosëm fokusin tonë nga ushqimi, i cili ishte në fazën fillestare, tek materiali ndërtimor. Pra, nga këto 300 tonë ndihma, ka 14 maunë, rreth 270 tonë janë material ndërtimi ndërsa pjesa tjetër është ushqim, dyshekë dhe pelena”, tha Karaliç.
Ky i fundit tha se kjo është një ndihmë nga populli i Bosnjes për Shqipërinë.
Konsulli i nderit në Bosnje Hercegovinë, Muharrem Zejnullahu, falenderoi “Pomozi.ba” dhe të gjithë qytetarët boshnjakë që ofruan ndihmë për Shqipërinë.
“Kjo është një nga autokolonat më të mëdha të ndihmës humanitare të këtij lloji që niset pas tërmetit në Shqipëri. Një autokolonë e madhe, 14 maunë të mëdhenj me 300 tonë materiale ndërtimi dhe ndihma tjera”, tha Zejnullahu.
Autokolona pritet të mbërrijë sot në Durrës dhe do të dorëzohet në shtabin e emegjencave në Durrës.
Tërmeti i fuqishëm i 26 nëntorit la pas 51 viktima dhe qindra të plagosur.
Gjithashtu u regjistruan edhe dëme të konsiderueshme materiale, ku mijëra qytetarë mbetën pa shtëpi.
