Ka mbërritur avioni i parë me qytetarë afganë në Kosovë. Mësohet se janë rreth 100 afganë që kanë zbritur në Aeroportin Ndërkombëtar të Prishtinës, ndërsa ata pritet të strehohen në në bazën ushtarake “Bondsteel” në Ferizaj.
Në aeroport për të pritur refugjatët afganë, kanë qenë presidentja e Kosovës Vjosa Osmani dhe kryeministri Albin Kurti. Po ashtu nuk ka munguar edhe amabsadori amerikan Philip Kosnett. Rreth aeroportit ka forca të shtuara të policisë për të siguruar ardhjen e shtetasve afganë në vend. Kosova pritet të strehojë rreth 2 mijë afganë.
Ndërkohë, në Shqipëri kanë mbërritur deri tani katër avionë me qytetarë afganë. Ata janë akomoduar në disa ambiente hotelesh në qytetin e Durrësit dhe në konviktet e Qytetit Studenti. Në vendin tonë pritet të vijnë rreth 4 mijë afagnë.
Evakuimet nga aeroporti i Kabulit janë duke vazhduar, ndërsa afati i fundit është data 31 gusht. SHBA po vazhdon ende me evakuimet, ndërsa disa prej shteteve kanë deklaruar se i kanë përfunduar.
Situata në aeroportin e Kabulit ka qenë mjaft e tensionuar ditët e fundit, ku disa shpërthime që ndodhën ditën e enjte u morën jetën më shumë se 100 personave dhe plagosën qindra të tjerë. Një tjetër shpërthim ndodhi ditën e sotme, ku si pasojë mbeti i vrarë një fëmijë.
