Ka mbërritur në vendin tonë avioni i radhës me qytetarë nga Afganistani. Lajmin e ka bërë të ditur ministrja për Europën dhe Punët e Jashtme Olta Xhaçka, me anë të një postimi në rrjetet sociale.
Xhaçka bën me dije se kanë mbërritur 259 fëmijë, gra e burra të larguar nga Mazari Al Sharif. Ministrja shkruan se ata tashmë kanë një strehë të sigurt, duke rikonfirmuar përkushtimin e Shqipërisë për shpëtimin e qindra afganëve.
“259 fëmijë, gra e burra të larguar nga Mazari Al Sharif, kanë mbërritur pak më parë në aeroportin e Rinasit. Falë koordinimit me partnerët, ata kanë tani një strehë të sigurt, duke rikonfirmuar edhe njëherë seriozitetin dhe përkushtimin e Shqipërisë, për shpëtimin e qindra qytetarëve afganë”, shkruan ministrja.
Kujtojmë se Shqipëria është një nga vendet që ka pranuar të strehojë përkohësisht rreth 4 mijë qytetarë afganë, të cilët lënë vendin pas ardhjes në pushtet të talebanëve, që në muajin gusht. Deri tani në vendin tonë kanë mbërritur mbi 700 qytetarë afganë, të cilët janë strehuar në resorte në Durrës e Shëngjin. Destinacioni i tyre përfundimtar do të jenë Shtetet e Bashkuara të Amerikës. Këto të fundit kanë shprehur mirënjohje për Shqipërinë, që pranoi të strehonte refugjatët afganë. Po ashtu edhe Kosova ka pranuar të strehojë rreth 2 mijë afganë.
