Kanë mbërritur në aeroportin “Nënë Tereza”,208 mijë doza të vaksinës kineze Sinovac. Mësohet se kjo është pjesa e fundit e vaksinave të siguruara nga kontrata me prodhuesit e kësaj kompanie. Ministrja e Shëndetësisë, Ogerta Manastirliu tha se në total, së bashku me ngarkesën e sotme janë marrë nga Sinovac gjithsej 500 mijë doza vaksinash. Në pistën e Rinasit, vaksinat janë pritur nga dy ministrat Arben Ahmetaj dhe Ogerta Manastirliu, të cilët kanë bërë me dije se ngarkesa e fundit përmbyll edhe lëvrimin e kontratës me distributorin turk të vaksinës. Gjithashtu ministrja Manastirliu tha se procesi i vaksinimit po ecën me ritme shumë të shpejta. Ajo lajmëroi se sot në mbrëmje pritet një tjetër ngarkesë prej 8190 dozash nga Pfizer. Manastirliu ka treguar se objektivi është 500 mijë vaksinime deri në maj.
“208 mijë vaksina sapo kanë mbërritur në aeroportin e Rinasit, të sinovaks. 500 mijë në total doza vaksina. Nga momenti i parë i procesit të lëvrimit në Shqipëri kemi më shumë se 700 mijë doza vaksinash që kanë mbërritur. Po ecet me ritme shumë të larta të vaksinimit. Sot në mbrëmje pritet përsëri 8190 doza nga kontrata e Pfizer. Objektivi ynë 500 mijë vaksinime deri në maj”, deklaroi Manasitrliu.
Ndërkaq ministri i Rindërtimit Arben Ahmetaj, theksoi synojnë një turizëm të hapur për vendin.
“Sot përfunduam kontratën për të sjellë 500 doza të Sinovac. Siç premtuam ditën e parë të kësaj pandemie që do kujdesemi për shëndetin e qytetarëve.
Kjo stinë turizmi të jetë e hapur për Shqipërinë”, tha Ahmetaj.
