Kanë mbërritur në aeroportin “Adem Jashari” të Prishtinës personat që i mbijetuar aksidentit tragjik që ndodhi të dielën në Kroaci.
Mediat kosovare raportojnë se të pranishme kanë qenë dy autoambulanca për të trajtuar ata që kishin nevojë për ndihmë mjekësore.
Të pranishëm për t’i pritur kanë qenë familjarët e tyre, të cilët i kanë pritur me vetura dhe kanë hyrë në aeroport për t’i marrë më pas në shtëpi, ndërsa e oranishme ka qenë edhe policia që ka shpërndarë ujë për personat që po prisnin. Gjithashtu të pranishëm kanë qenë edhe zyrtarë të lartë që nga presidentja e Kosovës, Vjosa Osmani, kryeministri Albin Kurti, kryetari i parlamentit Glauk Konjufca dhe ministri i Brendshëm, Xhelal Sveçla.
Aksidenti i rëndë ndodhi ditën e dielë rreth orës 06:00 të mëngjesit në autostradën Sllavonski Brod në Kroaci, ndërsa autobusi ishte duke u kthyer nga Frankfurti për në Prishtinë. Të pranishëm në autobus ishin në total 69 persona, së bashku me dy shoferët, njëri prej të cilëve humbi jetën ndërsa ishte duke pushuar, kur sapo ishte ndërruar nga kolegu që humbi kontrollin e mjetit.
10 persona humbën jetën dhe u plagosën 45 të tjerë, mes të cilëve edhe fëmijë. Ndërkohë, ditën e sotme ministri i Shëndetësisë së Kosovës njoftoi se 15 persona që vazhdojnë të marrin trajtim mjekësor, ndërsa 26 të tjerë kanë dalë nga spitali.
