Eugena Tomini, shefja e Survejancës dhe Shërbimit të Inteligjencës Epidemike në Institutin e Shëndetit Publik (ISHP), ishte e ftuar mbrëmjen e sotme në “TopStory” në News24 për të folur në lidhje me masën me të re nga qeveria për mbajtjen e maskës edhe në ambientet e jashtme.
Gjatë intervistës, Tomini tha se janë një mori elementesh që janë vlerësuar që nga koha e shfaqjes së pandemisë Covid në muajin mars e deri tani, në lidhje me detyrimin për mbajtjen e maskës nga ana e popullatës.
Tomini tha se, “janë vlerësuar tre indikatorë: sa i përket pozitivitetit, nëse do të kishim një trend të shtuar të rasteve në spital por edhe ato që kërkojnë terapi intensive, dhe ndërkohë niveli i vdekjeve”.
“Këto tre indikatorë janë vlerësuar jo vetëm në nivelin e Shqipërisë por përsa i përket rajonit, si ka ecur trendi meqënëse Shqipëria është e hapur me vendet e botës. Është vënë re se në 5-6 javët e fundit edhe në Europë ka filluar një tendencë në rritje e pozitivitetit, rasteve e vdekjeve, por edhe në rajon”- tha Tomini.
“Pse duhet të jetë një masë kaq e fortë dhe çudibërëse në popullatë, ndërkohë që shumë vende me kulturë dhe edukatë shëndetësore, si Mali i Zi, Kosova, po të shohim vetëm këtë të fundit ka një ulje drastike të rasteve vetëm me respektimin e kësaj mase që në muajin korrik. Ne nuk kemi një protokoll specifik për Covid, ndaj dhe janë disa lloj masash që në momente të caktuara bëhen decizive për t’u zbatuar”- deklaroi Tomini.
