Organizatat që dolën nga lufta e Ushtrisë Çlirimtare të Kosovës do të zhvillojnë sot pasdite në Prishtinë një protestë paqësore kundër padrejtësive që, sipas tyre, po ndodhin nga Gjykata Speciale në Hagë, veçanërisht lidhur me përdorimin e dokumenteve të Serbisë në proceset gjyqësore ndaj ish-krerëve të UÇK-së.
Tubimi me moton “Kundër padrejtësisë” do të mbahet në orën 17:00 në sheshin “Skënderbeu”. Organizata e Veteranëve të Luftës së UÇK-së u ka bërë thirrje qytetarëve që të bashkohen në këtë protestë për të treguar solidaritet me liderët e arrestuar dhe për të mbrojtur vlerat e luftës çlirimtare.
“Ftojmë të gjithë ata që ndajnë të njëjtin shqetësim me ne, që t’i bashkohen protestës për të dërguar një mesazh të qartë se luftëtarët tanë nuk janë vetëm”, u shpreh përfaqësuesi i OVL-UÇK-së, Gazmend Syla.
Kryetari i Prishtinës, Përparim Rama, konfirmoi përmes rrjeteve sociale se qyteti do t’i bashkohet zyrtarisht protestës, ndërsa presidentja Vjosa Osmani e cilësoi alarmante pranimin e provave nga Serbia në proceset gjyqësore.
“Dokumentet serbe janë historikisht të falsifikuara dhe kanë për qëllim të rishkruajnë historinë tonë”, tha Osmani, duke u bërë thirrje qytetarëve dhe institucioneve që të qëndrojnë të bashkuar.
Protesta ka marrë mbështetjen e gjerë të shoqërisë, përfshirë partitë politike, deputetë, organizata joqeveritare dhe qytetarë nga e gjithë Kosova.
Procesi ndaj ish-krerëve të UÇK-së
Ish-presidenti Hashim Thaçi, bashkë me Kadri Veselin, Jakup Krasniqin dhe Rexhep Selimin, po gjykohet në Hagë për krime të dyshuara lufte dhe kundër njerëzimit. Në prill të vitit të kaluar, ndaj Thaçit u ngrit edhe një aktakuzë e dytë për përpjekje për të ndikuar në dëshmitarë, ku përfshihen edhe figura të tjera si Hajredin Kuçi, Bashkim Smakaj, Isni Kilaj dhe Fadil Fazliu.
Më 5 gusht 2025, Gjykata Speciale vendosi të zgjasë paraburgimin për Thaçin dhe tre të akuzuarit e tjerë. Gjyqtarja e çështjes, Marjorie Masselot, argumentoi se ekziston ende rreziku që Thaçi të pengojë procedurat gjyqësore, të arratiset apo të kryejë krime të tjera. Ekipi i tij mbrojtës nuk ka paraqitur përgjigje ndaj kërkesës së Prokurorisë për zgjatjen e paraburgimit.
